Cathrina úr Miðvági – vandafull farmasigling á fjarskotnum leiðum í 1971

16. apríl 2022 

Herbjørn Gásdal úr Sørvági greiðir frá

...... Túrin frammanundan var ein róðurgangari skotin frá landi, so vit royndu at brúka sjálvstýraran mest møguligt.......

....... , og tá ið tað fór at skýma, hildu vit, at vit kundu sleppa avstað í myrkrinum. Vit tóku spakuliga akkerið upp og loystu hvør frá øðrum, men tað skuldu vit ongantíð gjørt, tí knappliga tóku herskipini at skjóta eftir okkum........

........ Tað var nokk so øgiligt at síggja teir koma umborð tysjandi alvápnaðir við maskinbyrsum og øðrum. Teir komu leypandi upp á brúnna, og 4 av teimum settu maskinbyrsumúlarnar móti mær, meðan heryvirmaðurin, ið vísti seg at vera hin næsthægsti á krígsskipinum, setti revolvaran í búkin og spurdi........

Les allað greinina HER

Dagføring árstalsbólkar

13. apríl 2022

Ein dagføring av ártalsbólkunum er gjørd. Árstali er sett framman fyri hvørt skipið, tað árstali skipi kom í Vágar á fyrsta sinnið.

Sum áður nevnt gongur strilti at finna sluppmyndir, men onkur kemur undan kavi her og har, og tað er mest uttanfyri landoddarnar at myndir finnast, einamest í Íslandi, har vælskipa myndasøvn finnast á netinum. Tað besta eigur “Thjóðminjasafn Íslands” og haðani hevur hetta savni keypt myndir frá, tær eru í hágóðsku.

Mynd og dagføring er komin fyri sluppirnar: Dúgvan úr Sandavági, Herkules úr Sørvági, Galway úr Sandavági og Alexandra úr Sandavági. Tær eru í árstalsbólkinum “Skip Vágar 1872-1938” 

Síðan er komi undan kavi, at farmaskipi Star Coast hevði heimstað í Sørvági. “Skip Vágar 1970-1979”

Star Shipping, ið átti eina røð av coastarum í 1970unum, valdi at skráseta skipini runt í Føroyum, hvat so enn endamálið við tí var, møguliga partaeigara samanseting. Øll farmaskipini við fornavninum Star: Star River - Saltangará 1976 // Star Sea – Tórshavn 1976 // Star Firth - Fuglafjørður 1976 // Star Ocean - Tórshavn 1977 // Star Coast - Sørvágur 1976 // Star Bay - Klaksvík 1976. 

Í 1980unum fekk Star Shipping nýggjari og betri skip, Star Finlandia, Star Skandia, Star Saga og Star Viking.

Framúr hágóðsku myndir eru komnar fram í ljósi av sandavágssluppini Keflavík, tað eru lagdar út her. “Skip Vágar 1872-1938”

Ein dagføring er gjørd av línubátinum Miðvingi, sum kom til Miðvágs í 1976. “Skip Vágar 1970-1979”

Og so er tað Bosin VA7 úr Sørvági, sum einki finst um, áhugavert hevði verið at fingi søguna hjá hesum deksbáti setta upp, hvør átti hann í Sørvági? Nær kom Bosin til Sørvágs? Og hvør átti hann áðrenn? Og ikki minst hvar dekksbáturin var bygdur og árstal? Tað sum vit vita um Bosin er, at hann sakk við Føroyingahavnina í 1957. “Skip Vágar 1939-1957”

janerik

Leinkjur til árstalsbólkarnar:

Skip Vágar 1872-1938

Skip Vágar 1939-1957

Skip Vágar 1958-1969

Skip Vágar 1970-1979

Skip Vágar 1980-1989

Skip Vágar 1990-1999

Skip Vágar 2000-2009

Skip Vágar 2010-2018

“POLAKKARNIR”

10. apríl 2022

 Teir polskt bygdu línubátarnir frá 1976 og 77 eru nú søga í Føroyum. Tríggir teir seinastu, ið høvdu upprunasniði vóru upphøgdir í 2021. Tveir í Føroyum og ein í Danmark, ávikavist Vaðhorn og Mascot í Føroyum og Lækkaklettur, sum í Svøríki bar navnið Runavik, var upphøgdur í Danmark.

Sostatt eru tvey av systurskipunum eftir, eitt í Íslandi og eitt í Svøríki. Hesi bæði skipini eru so nógv umbygd, at tey eru ikki at kenna aftur, og visti tú tað ikki frammanundan, vildi tú ikki sagt at hetta vóru fyrrverandi “polakkar” úr Føroyum.

Tað er ofta bland komi í, hvør var hvør, serliga viðvíkjandi teimum trimum, sum endaðu í Svøríki.

Teir vóru:

Hamraberg/Atlantic/Kristin/Kenty/Hållö

og

Lækkaklettur/Høgiklettur/Vágaklettur/Neptun/Runavik

og

Hagaleiti/Nípan/Odeskär/Rön

Her er ein útgreining av teimum 9 “polakkunum”, sum komu til landi í 1976 og 1977.

LES MEIRA UM “POLAKKARNAR” HER

Bøkurnar eru at fáa í bókabúðunum kring landi

Bókin "Í kjalarvørrinum á Thunder" komin út

15. juli 2021

Bókin “Í kjalarvørrinum á Thunder” er umseting av norsku bókini “Jakten på Thunder” eftir Ketil Sæter og Eskil Engdal, sum kom út í 2017. 

Bókin sum er skjalfest krimisøga er úrslit av grópandi journalistikki hjá norsku tíðindamonnunum, ið hava ferðast kring heimin og gjørt samrøður við fólk, ið onkursvegna vóru partur av ránsveiðuni eftir patagoniskum tannfiski í altjóða sjógvi í Suðuríshavinum við Antarktis.

Tær flestu samrøðurnar eru sjálvsagt við tey sum jagstraðu veiðutjóvarnar, tí eitt fátal av teimum, ið luttóku í fiskiskapinum, tordu ikki, ella vildu ikki, úttala seg um nakað sum helst.

Høvuðsleiklutin í bókini hevur Thunder, ein fyrrverandi føroyskur trolari, sum varð umbygdur at fiska við gørnum. Talan er um sørvágstrolaran Vesturvón, sum varð latin eigarunum í 1969, hann varð seldur úr Føroyum í 1986.

Í bókini “Vesturvón – tí tað skal vera ein vón fyri vestan” er partur av hesi bók umsettur og tikin við. Men bókin “Í kjalarvørrinum á Thunder” er nógv rúgvismiklari enn bara Thunder, tí hon telur knappar 400 síður, har fleiri ránsveiðiskip vera tikin fram og viðgjørd. Leitað verður eftir eigarunum á ránsveiðiflotanum, og flestu, fyri ikki at siga allir pílar peika ímóti landspartinum Galicia í Spania, har størsta mafian ikki er innan rúsevnasmugling, men innan fiskivinnu, millum annað í ránsveiðuni eftir patagoniskum tannfiski. Fiskiveiðumafian verður rópt “La Mafia Gallega”. 

Tað vórðu nógvir faktorar, sum gjørdu at ránsveiðan eftir tannfiski varð steðgað, men høvuðsleiklutin í stríðnum at basa veiðutjóvunum áttu myndugleikarnir í Noregi, Australia, New Zeelandi og USA. Umframt hesi lond, vóru eisini fleiri felagsskapir áhugaðir í at steðga hesi eyðræning av fiskiríkidøminum í Suðuríshavinum, tey mest umtalaðu í bókini eru altjóða løgreglusamtaki Interpol, spanska løgreglan Guardia Civil og umhvørvisfelagsskapurin Sea Shepherd.

Tá komið er út í 2018 eru tey flestu ránsveiðiskipini avrættað á ymiskan hátt. At enda koma dómsúrskurðarnir fyri ránsveiðuna, bæði yvirmenn á skipunum og reiðarar fáa risabøtur.

Soleiðis skrivaðu norsku fjølmiðlarnir um bókina í 2017:

-       Eitt tað týdningarmesta íkastið til norskar heimildarbókmentir í 2017. (VG)

-       Ein djúp spenningssøga frá einum kaldblóðigum veruleika. (Dagbladet)

-       Teir garvaðu tíðindamenninir Eskil Engdal og Kjetil Sæter nýta spenningssøgurnar skap og mál, tá teir bera fram søguna um dystin móti duldarfullu ránsveiðimonnunum ... “Jakten på Thunder” er ein fullkomin blaðmannafrásøgn ... ein blandingur av spennandi skaldsøgu við bókmentarligari ávirkingarmegi og eini ferðafrásøgn av tí góða gamla slagnum. (Dagbladet)

-       At fáa sjóverk av eini bók er at yvirdríva. Men tað kitlar í búkininum, eftir at hava lisið nakrar fáar síður. (Effekt)

Bókin kann bíðleggjast hjá Bókamiðsøluni og er at fáa í bókabúðunum kring landi

Umbróting og prenting: Føroyaprent

Jan Erik Simonsen týddi

Forlagið á Merkrunum í Sandavági gevur bókina út.

Nýggj bók til Vestanstevnu

24.juni 2021

Um ikki so langa tíð, helst áðrenn Vestanstevnu kemur nýggj bók á marknaðin.

Bókin “Í kjalarvørrinum á Thunder” er týðing av norsku bókini “Jakten på Thunder”.

Høvuðsleiklutin í bókini hevur Thunder, ein fyrrverandi føroyskur trolari, sum varð umbygdur at fiska við gørnum. Talan er um sørvágstrolaran Vesturvón, sum varð latin eigarunum í 1969, hann varð seldur úr Føroyum í 1986.

Í bókini “Vesturvón – tí tað skal vera ein vón fyri vestan” er partur av hesi bók umsettur og tikin við. Men bókin “Í kjalarvørrinum á Thunder” er nógv rúgvismiklari enn bara Thunder, tí hon telur knappar 400 síður, har fleiri ránsveiðiskip vera tikin fram og viðgjørd. 

Forlagið á Merkrunum í Sandavági gevur týðingina út 

Jan Erik Simonsen týddi

JÓLATILBOÐ - bókin VESTURVÓN

1. december 2020

JÓLATILBOÐ - bókin VESTURVÓN

Allan december mánað 2020 verður bókin Vesturvón at fáa fyri 298,- krónur

Fæst í øllum bókabúðum kring landi.

Bókin kann eisini keypast á netinum frá Rit & Rák 

Keyp av bókini VESTURVÓN á netinum

Ynskir tú at keypa bókina VESTURVÓN á netinum og fáa hana senda við postinum?

Far inn á síðuna hjá Gamla Bókhandli bokhandil.fo ella hjá Rit & Rák ritograk.fo ella trýst á aðra av leinkjunum niðanfyri fyri at keypa bókina

Rit & Rák / bókin VESTURVÓN   KEYP NÚ

Óli Jacobsen ummælir bókina Vesturvón í Siðsøgan í Vikuskiftis Sosialinum

VESTURVÓN – vónin sum bleiv veiðutjóvur

Trolarin Vesturvón skapti vón í Sørvági og ótryggleika í Suðuríshavinum. Endin var, at manningin sjálv søkti gamla stoltleikan hjá vágamonnum

Tað er hugaligt, at tað eru menn, sum seta sær fyri at fáa okkara fiskivinnu og fiskimannasøgu setta á blað. Í seinastu viku kom út bókin ”Vesturvón”, sum er ein týðandi partur av okkara nýggjaru fiskivinnusøgu.

Bókin er ikki smávegis avrik, nærum 680 síður, sum eisini snúgva seg um aðra fiskivinnusøgu enn Vesturvón.

Les alt ummæli hjá Óla Jacobsen HER

Stuðlar Bókaútgávan "Vesturvón - tí tað skal vera ein vón fyri vestan"

25. december 2019

Bókaútgávan "Vesturvón - tí tað skal vera ein vón fyri vestan"

Ein hjartans tøkk til tykkum sum hava stuðla bókini og bókaútgávuni á ymsan hátt, uttan tykkum eingin bók.

Tey sum hava stuðla mær við bókaútgávuni eru:

Sørvágs kommuna

Klaksvíkar kommuna

Vága kommuna

Mentunargrunnur Landsins

Lions Vágar

JFK Trol og Kósin við Hanus Hansen

Snarfrost við Tummas Henriksen

Fossá við Hálvdan Gudmundsen

Luna - Hiddenfjord við Atla Gregersen

Framherji við Anfinn Olsen

Varðin við Jákup Jacobsen

Pelagos við Jóhan Páll Joensen

Petur Larsen/Baader við Atla Larsen

Bakkafrost við Regin Jacobsen

Varðin Pelagic við Boga Jacobsen

Christian í Grótinum við Kristian Martin Rasmussen

Norðoya Sparikassi

Bank Nordik

Trygd

Betri Banki 

Betri Trygging

Bókaummæli:

Jóan Pauli Joensen

Óli Jacobsen

Lýsingar og miðlaumtala:

JN.FO

VP.FO

R7.FO

PORTAL.FO

IN.FO

DIMMA.FO

KRINGVARP.FO

Dimmalætting

Sosialurin 

Gleðilig Jól og Gott Nýggjár og takk fyri tað brátt farna árið, ynski eg øllum nær og fjar.

Jan Erik Simonsen

Tríggar bøkur sum hoyra óloysiliga saman í mínum hugaheimi

25. december 2019

- "Jakten på Thunder" sum kom út í 2017 á norskum og seinni givin út í 9 londum. Í 2019 partvís umsett til føroyskt í bókini Vesturvón.

- "Stellurnar" - triðja bókin í røðini "Teir tóku kjansin" sum kom út á heysti í 2017, hetta vórðu systurskipini hjá Vesturvón. Tilsamans vóru hesi trý skipini Stella Kristina, Vesturvón og Stella Karina fyrstu hekkutrolarar, ið føroyingar bygdu.

- "Vesturvón - tí tað skal vera ein vón fyri vestan" sum kom út í desember 2019.

Jan Erik Simonsen

Bókatútgáva: Vesturvón tí tað skal vera ein vón fyri vestan

16. december 2019

Havi ikki sæð so nógvar glaðar sørvingar ísenn sama dag, síðan ein fótbóltsdyst síðst í 1980unum 

Takk fyri móttøkuna av bókini allir sørvingar og túsund takk til bygdarráðið og Sørvágs kommunu.

Bókin Vesturvón - tí tað skal vera ein vón fyri vestan, var handa øllum húskjum í Sørvágs kommunu í dag 16. december 2019 á kommunskrivstovuni í Sørvági.

Umframt bókina Vesturvón, fingu sørvingar eina karamellueskju og jólaheilsan frá kommunalinum, í eini jólagávu.

janerik

Gávan frá Sørvágs kommunu til øll húski í kommununi

Jóan Pauli Joensen ummælir bókina Vesturvón

15. december 2019 

Jóan Pauli Joensen ummælir bókina Vesturvón

Jan Erik Simonsen hevur skrivað eina sera áhugaverda bók um tann fyrsta hekkutrolaran Vesturvón. Hann setur hann í ein størri samanhang, og letur eisini fólk, sum hava havt við hetta skip at gera, sum í síni tíð var stoltleikin hjá sørvingum, siga sína søgu.

Les alt ummæli HER 

Bókin Vesturvón er komin í bókabúðirnar

11. december 2019

Bókin “Vesturvón” er komin í bókabúðirnar

Teir vóru við, tá klippfiskaturkingin var í hæddini, og turkihúsini stungu seg upp kring landið.

Teir vóru uppi í teimum fyrstu at byggja stállínuskip í 1950unum.

Teir vóru í fremstu røð, tá føroyingar bygdu sínar fyrstu hekkutrolarar síðst í 1960unum

Her er talan um Niclasenbrøðurnar í Sørvági, Hannus Niclasen, Hjalmar Hvítklett og Eivind Niclasen.

Navnið bleiv Vesturvón – tí tað skuldi vera ein vón fyri vestan. 

Í bókini fylgja vit undangongumonnnunum úr Sørvági, frá tí teir byggja turkihús, síðan var farið undir skipabygging; fyrst eitt stállínuskip í 1958 og í 1969 ein hekkutrolara. 

Hesin hekkutrolarin frá 1969 hevur eina serliga og áhugaverda søgu, heilt frá tá fyrireikingarnar at byggja hann byrjaðu í 1968, og líka fram til hann fór úr føroyska fiskiskipaflotanum í 1986. 

Vesturvón – stoltleikin hjá sørvingum – krússaði seg ígjøgnum fíggjarlig stormlágtrýst, vinnuligar ósemjur og maskinskaðar. Miðlaumtala var so at siga dagligdagur hjá skipið, manning og reiðaravirki upp ígjøgnum 1970ini. Allíkavæl hóraðu teir undan og fingu vind í seglini.

Hvussu alt hetta læt seg gera, kann lesast um í bókini.

Vesturvón var partur av eini kollvelting av føroyska trolaraflotanum síðst í 1960unum. Men hann var eisini ein kollvelting fyri eingilskmenn og fiskivinnubýin Hull í 1986. Og sjálvt um eingilskmenn vóru fyrstir at royna við hekkutrolara í 1946, vóru teir afturúrsigldir, og komu ikki fyri seg aftur fyrrenn í 1986. Tá ein nýggj tíð kom við keypinum av Vesturvón úr Sørvági.

Tá tíðin hjá skipinum í Hull var at enda komin um ártúsundskiftið, byrjar ein nýggj agenda við ólógligari fiskiveiðu, ella rættari, eini væl tilrættis lagdari ránsveiðu eftir tí hótta “hvíta gullinum”, patagoniskum tannfiski. Vesturvón hevði nú fingi “høvuðsnavni” Thunder, men hevði annars fleiri “fyribilsnøvn”. Skipið herjaði og stjól í Suðuríshavinum í 15 ár. Menn ið vórðu við hetta tíðarskeiði meta, at Thunder ránsfiskaði fyri nærum 600 millónir føroyskar krónur, tað er næstan tríggjar ferðir so nógv sum Vesturvón fiskaði fyri undir føroyskum flaggi.

Bókin er deild upp í tríggjar høvuðspartar, fyrst tann søguliga gongdin hjá reiðaravirki og skipi. Annar partur er samrøður við menn, ið sigldu við og øll hagtøl hjá Vesturvón frá 1969 til 1986. Triði og seinasti partur er tíðin í Hull, hareftir ránsveiðan og tann seinasta jakstranin eftir skipinum, sum at enda søkkur.

Kunning til borgarar í Sørvágs kommunu:Sørvágs bygdaráð hevur á fundi 11. desember 2019 samtykt at keypa eitt eintak til hvørt húsarhald í kommununi. 

Bókin telur 681 síður og kostar 398,- krónur.

Bókin fæst til keyps í bókabúðunum kring landi:

H.N.Jacobsens bókhandli í Havn

Rit og Rák í SMS

Bókabúðin í Runavík

Alfa bókhandil í Klaksvík

Leikalund í Klaksvík

Suðuroyar Heimavirki í Vági

Tangabúðin á Tvøroyri

Stanley við Streymin á Norðskála

Matvørðubúðin í Nólsoy

FK í Miðvági

Og heima hjá forlagnum á Merkrunum 8 í Sandavági (einans kontant søla)

Jan Erik Simonsen

Bókaútgáva: Vesturvón - tí tað skal vera ein vón fyri vestan.

25. juli 2019

 At eg nakrantíð skuldi fara at skriva eina bók og gerðast rithøvundur, hevði eg ikki í mínum villasta fantasi hugsa mær. Í dag fekk Føroya Prent handa geyman til rúgvismikla bók við fleiri enn 400 síðum, ið umrøður hekkutrolaran Vesturvón frá 1969. Um alt gongur sum ætlað verður bókin í sølubúðunum í november.

Jan Erik Simonsen

Myndir av Vesturvón, sum kom í 1969

25. apríl 2019

Tað vóru hálvthundrað ár, tann 13. apríl 2019, síðan hekkutrolarin Vesturvón kom á Sørvág fyrstu fer.

Tí sóknist eg eftir einari ella fleiri myndum frá stóra degnum í Sørvági, har Vesturvón sæst flaggskrýddur. 

Jan Erik Simonsen

fartlf 212753

teldupost janerik_69@hotmail.com

messenger janerik.simonsen

GULLTOPPUR / FORSETI / TINDHÓLMUR.

6. januar 2019

TEKNINGAR GULLTOPPUR / FORSETI / TINDHÓLMUR.

Í samband við at Esbern Joensen í Sørvági hevur ætlanir um at byggja eitt model av koltrolarnum Tindhólmi, sóknast vit eftir tekningum av skipinum í upprunalíki.

Leiting er longu sett í verk í Englandi og Íslandi, men ein møguleiki kann vera at onkur í Føroyum liggur inni við tekningum av skipinum, so vilja vit fegin hoyra frá tykkum.

Stutt um skipið:

Trolarin er bygginummar 50 hjá Kaldnes Mekaniske Verksted í Tønsberg í 1927, men skipið blívur liðugt bygt hjá skipasmiðjuni Menzies & Co í Leith í 1928.

Skipið hevði sín fyrsta heimstað í Reykjavík og bar navnið Gulltoppur. Reiðaríði var H/F Sleipnir og seinni H/F Kveldulfur, bæði í Reykjavík.

Í 1945 fær trolarin navnið Forseti og felagið aftanfyri er H/F Hængur.

Eitt stutt skifti leigaði Sørin Nielsen í Sørvági, Forseta frá íslendingum.

Í 1953 keypir P/F Drangur við Jógvan Elias Thomsen í Sandavági trolaran, hann fær navnið Tindhólmur VA115 við heimstaði í Sørvági.

Í 1957 fær Tindhólmur ein umfatandi umbygging hjá Kaarbøes Mekaniske Verksted í Harstad í Noregi.

Í 1960 keypir P/F Nónfjall við P.H.Weihe & Hugo Fjørðoy, Tindhólm á tvingsilsuppboði í fútarættinum.

Í 1965 er Tindhólmur seldur til Saltsøluna í Havn og í december 1965 upphøgdur í Dunston í Englandi. 

Jan Erik Simonsen

Teldupost: janerik_69@hotmail.com

Tlf +298 212753

Sørvágstrolarin Vesturskin

2. januar 2019

Í hálvum gekki hjá skipasmiðju í Walvis Bay.

Í december 2018 liggur fyrrverandi Vesturskin við kai hjá skipasmiðju í Walvis Bay, skipið sær út til at standa í hálvum gekki.

Fyrrverandi Vesturskin,  sum sambært netmiðlum nú eitur Rex I, er koyrt á sjógv aftur uttan at vera liðugt mála, einans grunding er á skrokkinum. Hvat orsøkin er til tað fekk eg ikki uppspurt.

Jólaaftan var undirritaði ein túr umborð á skipinum. Niðri á troldekkinum standa sylindarfóðringar, sum týðir uppá umvæling av høvuðsmotori. Eingin var umborð um hetta mundi og tískil eingin at spyrja um status hjá skipinum.

Eisini fer fram ein umvæling av trolspølunum, tá fleiri av hydraulikmotorunum er avmonterðaðir. Eisini sæst at trolbanin hevur fingið stál skift.

Les søguna um sørvágstrolaran Vesturskin frá 1986 trýst HER

Katrin Jóhanna VA410

8. december 2018

Katrin Jóhanna, Miðvágur - nýggjasta skipið í føroyska fiskiskipaflotanum er ávegis heim. 

Tað er P/F Kinnfelli ið hevur keypt skipið úr Noreg fyri 43,5 milliónir krónur, oddamaður í felagnum er Tummas Henriksen úr Sørvági.
Skipið fær heimstað í Miðvági við VA410 og kemur at landa til Snarfrost, sum er við at vera klárt at taka ímóti veiðuni.

Nýggja skipið hevur saman við Snarfrost menningarkvotur í fýra ár, kvoturnar eru 10.400 tons av svartkjafti, 2002 tons av makreli og 1593 tons av sild.

Skiparin verður Árni Krog Dalsgaard, sum eisini er parteigari í felagnum.
Skipið eitur eftir mammu reiðaran Tummas Henriksen. Katrin Jóhanna  var gift navnframa skipara og reiðara Jósup Henriksen úr Sørvági.

Fýra systurskip eru av hesum slagnum, tey eru 73 metur til longdar tað blivu trý bygd í Chile, tey vóru: El Cazador(1997), Murman II(1998) og Christian í Grótinum(1998). Og Zeta/Herøy/Katrin Jóhanna(1997) bygd í Noreg. Í dag eru hini 3 systurskipini heimahoyrandi í Chile og Katrin Jóhanna við heimstaði í Føroyum.

Teir 3 í Chile bygdir hjá skipasmiðjuni Astilleros y Servicios Navales í Santiago og Zeta/Herøy/Katrin Jóhanna(1997) hjá Myklebust Mek. Verksted í Noreg. 

Vit ynskja reiðarí, skipið og manning bestu eydnu.

janerik

Krosstindur VA230

23. juli 2018

Manningin á Krosstindi úr Miðvági í 1934 á sildaveiðu við Ísland.

Les meira um Krosstind HER

Bátaskip í Grønlandi í 1960unum.

29.juni 2018

Stuttfilmur um bátaskip í Grønlandi í 1960unum.

Jóan Jakku Magnussen úr Sandavági við Marité

Stuttfilmurin fortelur søguna um hvussu føroyingar vunnu sær rættindi í Grønlandi upp í gjøgnum 20. øld.

Lagt til rættis Helgi Jacobsen, tíðindamaður og rithøvundur

Trýst á hesa leinkju Bátaskip í Grønlandi

www.vagaskip.dk

St Agnes No 1 úr North Shields á Sørvágsfirði

20.05.2018

St Agnes No 1 úr North Shields á Sørvágsfirði

Ein forvitnislig mynd av eingilska trolaranum Agnes No 1 er komin undan kavi í myndasavninum hjá Petur Jacobsen (Pedda), úr Sørvági.

Les meira um hendingina á Sørvágsfirði og um trolaran HER.

Framsýning á Giljanesi

23. apríl 2018

Framsýningin hjá vágaskip var í vikuskiftinum inni á Giljanesi. 
Endiliga fingu tit øll, ið hava hjálpt til við myndum og tilfari, tað afturlønt við eini framsýning, við myndum, tekningum, filmum og modelskipum, ja enntá sluppu vit frammat stórskýggjanum.
Alt í alt ein góð upplinving fyri meg. Og gott at vita, at áhugin er so stórur, ja eri faktiskt ovfarin um undirtøkuna.
Men eitt skal eg lova tykkum, at vit steðga ikki her, og hetta vikuskifti hevur givið enn meira vind í seglini. 
Eg vóni at okkurt líknandi tiltak verður stápla uppá beinini í framtíðini. 
Túsund takk til tykkum, sum góvu mær tað álit og vildu læna mær eitt ella fleiri skipsmodel.
Takk til Eyðálvur Niclasen, umsjónarmennirnar á skúlanum á Giljanesi, og ljóðteknikarin Eyðun Ásason 

Jan Erik Simonsen

7. februar 2018

Árstalsbólkarnir her inni eru dagførdir, við fleiri myndum og upplýsingum.

Hendan dagføring var seinast gjørd fyri 5 árum síðan.

Bólkarnir eru nú meira brúkaravinarligir við øllum skipum í hvørjum bólki nevnd at byrja við, so tað verður skjótari at leita eftir ávísa skipinum.

Eisini eru leinkjur at enda í hvørjum bólki til tey skipini nærri greining ella myndir eru av.

Ein bólkur sum fyrstu ferð er fullførdur er ”Onnur skip Vágar”,  um tit hava fleiri uppskot til skip sum kunnu fara í hendan bólkin, hoyri eg heldur enn fegin um hetta frá tykkum.

Jan Erik

janerik_69@hotmail.com

Mary Margreth VA157

1. februar 2018

Mary Margreth var driftari keyptur til Sandavágs úr Englandi undir krígnum.

Skipið var í sera ringum standi tá tað kom til Føroyar, og fekk eina stóra umvæling áðrenn tað fór í vinnu.

Les søguna hjá skipinum Mary Margreth, um ognarviðurskiftir, umvælingar og tá skipið rendi á land og sakk.

Trýst HER.

Eftirlýsing av sluppmyndum.

24. januar 2018

Eftirlýsing av sluppmyndum.

Í samband við eitt miðvíst arbeiði, at finna fram til myndir av sluppum úr Vágum, fara vit at gera hesa roynd fyri at vita um ein ella fleiri myndir finnast av hesum sluppum. Tað er ikki avgerðandi at myndin er frá tí tíðarskeiðinum sluppin hevði heimstað í Vágum, bara tað er ein mynd.

Hesar tríggar sluppirnar, sum eg serliga sóknist eftir beint nú, vóru partur av skipunum, sum Jegvan Elias Thomsen keypti og átti, ella hevði raksturin um hendi hjá, samstundis sum hann var partaeigari.

Tær eru Galway VA223, Dúgvan VA178 og Alexandra VA214.

Nærri upplýsingar um sluppirnar:

Galway VA223

Bygd 1891 í Grimsby hjá Smith & Stephenson

83,11 BRT

1891 - Galway, Colchester

1901 - Galway TN22, Tórshavn - Jens Mohr, Hoyvík

1909 - Galway SA??, Skopun - Jákup Johannesen & Johan Hendrik Hansen, Skopun

1917 - Galway VA223, Sandavágur - Jegvan Elias Thomsen

1922 - Galway VN212, Vestmanna - Jóannes á Bakkanum, skipari, Vestmanna

1930 - seld til Tvøroyrar nýtt sum *hulkur.

*Hulkur: Ein niðurslitin slupp sum bleiv løgd fyri teym á vágni og nýtt sum goymsla

Alexandra VA214

Bygd 1879 í Hamburg hjá C.C.A. Dreyer

104,20 BRT

(dammslupp)

1879 – Alexandra GY756, Grimsby

1906 - Alexandra TG397, Trangisvágur  - Hans Jákup á Skalla, Tvøroyri

1917 - Alexandra VA214, Sandavágur - Jegvan Elias Thomsen

1920 - Alexandra FD557, Strendir - Sìmun Johansen við Keldu, skipari, Strendir

Dúgvan VA223

bygd 1878 í Rye í Sussex hjá James Collins Hood.

82,72 BRT

1878 - Game Keeper H???, Hull

1900 - Dúgvan TG314 - N.J.Mortensen, Tvøroyri

1908 - Dúgvan VA178, Sandavágur - Jóhan Johansen á Mýrini, skipari

1917 - Dúgvan VA178, Sandavágur - Jegvan Elias Thomsen

1923 - Dúgvan TG5, Tvøroyri - N.J.Mortensen, Tvøroyri

Løgd 1929.

Annars er áhugi fyri øllum sluppmyndum, skipsmanningum á sluppum og arbeiðslívið umborð á sluppum og skonnartum.

Um tit eiga nakað av tí sum er omanfyri nevnt, vil eg fegin hoyra frá tykkum.

Jan Erik Simonsen

janerik_69@hotmail.com

25. december 2017

Øllum tykkum sum hava hjálpt til við viðmerkingum og rættingum, fylgt við, og eru komin við myndum, fari eg at ynskja eini Gleðilig Jól og eitt av Harranum signað Nýtt Ár, við tøkk fyri alla hjálp í tí brátt farna.

Havi tað gott øll somul.

Bestu kvøður Jan Erik

Fleiri myndir eru at finna á bólkinum SIglingarsøgan í Vágum trýst HER

Seagull sum hevði "heimstað" í Vágum frá "1945" til 1977.

6. december 2017

Tá hendan myndin kom undan kavi, fór eitt stórt kanningararbeiði í gongd fyri at staðfesta hvør sluppin var, og tað var mest hugsandi ein slupp úr Miðvági ella Sandavági. Tá eg so ein góðan mánað seinni, fái 3 myndir, sum heilt klárt eru tiknar sama dag, gjørdist uppgávan løtt, tí á myndunum stóð VN219, sum Seagull hevði tá sluppin hevði heimstað í Vestmanna.

Síðan er søgan hjá sluppini Seagull útgreinað, og nógv áhugavert kemur undan kavið. Eitt mynstur sum rættuliga ofta kemur fyri er at sluppir bygdar í Englandi áðrenn ár 1900 og vera brúktar har, vera síðan keyptar til Íslands beint eftir 1900, fyri síðan at vera keyptar til Føroyar úr Íslandi, serliga í 1910unum og 1920unum.

Í heilt nógvum førum halda sluppirnar eingilska navnið allan vegin, og tað er helst eisini tilfelli við Seagull, søgan hjá Seagull í Englandi er tó ikki endaliga staðfest her frá, men kanska onkur veit meir um tann partin.

Les meira um Seagull úti í vinstru síðu ella trýst HER

 janerik

Mynd av Jegvan Elias Thomsen á Sandavági 9.mai 1956

10.september 2017

So var hon her! Myndin eg eftirlýsti av trolaranum Jegvan Elias Thomsen, flaggskýddur á Sandavági tann 9. mai 1956.

Men eg mátti heilt til Grimsby eftir myndini, sum er í vánaligum kvaliteti.
Eigur nakar eina slíka ella líknandi mynd, sum eg kundi lánt at kopiera.
Vinarliga skriva ein teldupost til janerik_69@hotmail.com

ella fartelefon 212753

Jan Erik Simonsen 
www.vagaskip.dk

Les um trolarin Jegvan Elias Thomsen HER

NÆRUM 100 ÁRA GAMLI HEIMDAL VENDIR HEIM AFTUR TIL MIÐVÁGS.

19. august 2017

Eftir 83 ár í útlegd hevur motorbáturin Heimdal aftur fingið heimstað í Miðvági.

Tað er Áhugafelagið Heimdal, sum hevur tikið stig til at keypa motorbátin aftur til bygdina.

Í samrøðu við stigtakarin til verkætlanina Dánial Joensen, greiðir hann frá, at prátið byrjaði fyri trimun árum síðan á Vestanstevnu í Miðvági 2014, tá tiltakið Fólkalívsmyndir við klippfiskatilvirking fór fram úti á Bakka í Miðvági. Tá hugleiddu Dánial Joensen og Jon Hansen sína millum, um hvussu áhugavert tað kundi verið, at átt eina slupp ella motorbát í bygdini, sum kundi lagt til kai og uppskipa veiðuna, og fyri síðan at framsýna hvussu fiskur bleiv hagreiddur á landi og pakkaður til útflutnings fyrr í tíðini. 

FINN HEIMDAL ÚTI Í VINSTRU SÍÐU ELLA TRÝST HER

SANDAVÁGSTROLARIN JEGVAN ELIAS THOMSEN.

22. juni 2017

Søgan hjá flotta sandavágstrolaranum, sum í 1950 var størsti trolari í Bretlandi og hevði sermerktan høvuðsmotor av slagnum Doxford.

Í 1956 tóku sandavágsmenn eitt ódnartak við keypinum av Jegvan Elias Thomsen fyrrverandi Lammermuir.

Fá innlit í hvussu Jegvan Elias Thomsen var innrættaður, brúgv, manningarrúm og maskinrúmið vera lýst við tekningum.

Ein nærri lýsing av høvuðsmotorinum og hvussu hann var uppbygdur, við myndum og teksti.

Les um skipasmiðjuna, systurskip og broytingartíðina í føroyska trolaraflotanum.

Ein hópur av myndum fleiri enn hundrað í tali vísa skipið frá byrjan til enda.

Les um mannin ið skipið eitur eftir, um Samvinnufelagið, um tveir skiparar sum høvdu serligan týdning fyri trolaran. Og um týdningin trolarin kom at hava fyri Sandavág og Vágoynna.

LES MEIRA TRÝST HER

Bill fann tekningar av Vesturskin.

26. mai 2017

Tað var tann 15. mai at vit eftirlýstu tekningar av sørvágstrolaranum Vesturskin.

Sama kvøld setti eg meg í samband við William Higginbotham, vanliga nevndur Bill, sum er hálvur sandavágsmaður, búsitandi í Neilston nærhendis Glasgow í Skotlandi.

Og í dag 26. mai hevur hann funnið 4 tekningar á einum savnið í North Yorkshire í Englandi.

Alt skrivligt tilfar frá skipasmiðjuni Cochrane & Sons í Selby, kom til Hull Maritime Museum tá skipasmiðja læt aftur. Fyri nøkrum árum síðan sendir Hull Maritime Museum alt arkivið viðvíkjandi Cochrane & Sons til North Yorkshire County Council. 

Hjá North Yorkshire County Council fæst at vita at alt arkivið hjá Cochrane & Sons er har, og tað er sera rúgvismikið, at tað tekur minst 16 dagar at leita tær ynsktu tekningarnar fram.

Men longu í dag hevur Bill fingið teldupost at tekningarnar: General Arrangement, Midship Section, Shell Extension og Profile & Deck Plan finnast í savninum og avrit kann latast av tekningunum.

Tað blivu bygdir 3 trolarar eftir hesum tekningunum. Bygginummar 1147 Leyland, 1148 Hammond(Vesturskin) og 1149 Larwood.

Vesturskin sum upprunaliga æt Hammond, bleiv bygdur hjá Cochrane & Sons í Selby í 1936 fyri Perihelion Steam Fishing Co. Ltd. v/ H.G. Grampin, reiðara í Grimsby.

Í 1939 ognartók Bretska Admiralty, Hammond og bleiv trolarin armeraður, ein sokallaðaur ASW trolari (Allied War Ship).

Í 1940 bleiv Hammond søktur av týskum flogfari uttanfyri Åndalsnes í Noreg, men tikin upp aftur av "Kriegsmarine" (týsku marinuni) og var síðan í tænastu hjá týskarum.

Eftir krígslok í 1945 bleiv Hammond latin upprunaligu eigarunum aftur.

P/F Vága Trolarafelag keypti hendan trolaran 31. juli 1946, og eftir umfatandi umbygging í Haugesund í Noreg kom Vesturskin til Føroyar fyrst í mars 1947.

Í 1954 bleiv Vesturskin seldur til Noregs og fekk navnið Sletnes við heimstaði í Kristiansund, skipið bleiv seinni upphøgt í Sandnessjøen í Noreg.

Fyrra greinin kann lesast longur niðri her á síðuni.

janerik

Siglingarsøgan í Vágum í myndum

26. mai 2017

Nógvar nýggjar myndir lagdar út á facebook bólkin Siglingarsøgan í Vágum.

Trýst HER

Tekningar av Vesturskin frá 1946.

15. mai 2017

 TEKNINGAR av VESTURSKIN 1946.

Í samband við at ætlanir eru um at gera eitt model av sørvágstrolaranum Vesturskin frá 1946, verður leita eftir tekningum at gera eftir.

Um tit eiga ella vita um tekningar av skipinum vinarliga seti tykkum í samband við Esbern Joensen í Sørvági, tlf 210233.

Ella send ein teldupost til janerik_69@hotmail.com ella postboð til síðuna Siglingarsøgan í Vágum á facebook. 

Skipið er bygt hjá Cochrane & Sons í Selby í Englandi í 1936, og fekk tá navnið Hammond.

Undir seinna heimskríggi hevði bretska marinan skipið og vóru nøvnini: Salier (1941); V.6115 (1942); NT.04 (1942) og V.6511 (1944).

P/F Vága Trolarafelag keypti hendan trolaran 31. juli 1946, og eftir umfatandi umbygging í Haugesund í Noreg kom Vesturskin til Føroyar fyrst í mars 1947.

Í 1954 bleiv Vesturskin seldur til Noregs og fekk navnið Sletnes við heimstaði í Kristiansund, skipið bleiv seinni upphøgt í Sandnessjøen í Noreg.

janerik

www.vagaskip.dk

Aftur ein málningur eftir Wiseman.

19. apríl 2017

Málningur eftir George Wiseman.

Ein málningur av Wiseman seldur til Leivur Nattestad, maskinmeistari á Varðberg, tá teir vóru í Aberdeen og seldu.

Leivur greiður frá at málningur kostaði 1 pund at keypa.

Fleiri málningar eftir Wiseman, trýst HER

Myndir av flaggskrýddum skipum.

12. mars 2017

Myndir av flaggskrýddum skipum.

Tað er nakað serligt tá eitt flaggskrýtt skip kemur inn eftir vágni, fjørðinum ella liggur við kai. Tað merkir alt annað líka, at her hava menn og kvinnur lagt rygg til, at fáa tað borið so í bandi, við felagsáhuga, við savnan av partapeningini og stovnað felag, so at tað gerst møguligt at bygga ella keypa eitt skip. 

Les meira HER

100 ára gamlar myndir av Dauntless úr Miðvági.

11. mars 2017

Dauntless VA30 var slupp við heimstaðið í Miðvági.

Myndin av Dauntless sum Mikkjal á Ryggi tók, er elsta mynd av slupp, sum er í savninum hjá www.vagaskip.dk.

Les meira um Dauntless HER.

Siglingarsøgan í Vágum í myndum.

23. februar 2017

Siglingarsøgan í Vágum í myndum.

Myndsavnið á facebook bólkinum Siglingarsøgan í Vágum veksur alsamt. Enn er tó langt á mál at fáa tær 5600 myndirnar sum eru tøkar, út aftur eftir at fb-profilurin bleiv slettaður í august 2015.

Tað liggja 2350 myndir í myndasavninum á facebook. https://www.facebook.com/groups/vagaskip/ sum er ein lítil helvt av tí tilfarið eg havi liggjandi í løtuni.

Enn er áhugði at fáa fleiri myndir til savnið.

Um tit hava myndir, sum tit vilja lata savnið fáa avrit av, so ber til at seta seg í samband við undirritaða so kunnu tær blíva skannaðar. Ella skanna sjálvi og leggja út á bólkin á facebook ella senda tær til mín á vagaskip@hotmail.com ella janerik_69@hotmail.com

Miðvíst og sjálvboði arbeiði

Tað var í 2010 at eg byrjaði eitt miðvíst og sjálvboði arbeiði at samla myndir saman av vágaskipum og sjólívinum hjá vágamonnum og í byrjanini var tað ein facebook síða um stállínuskipið Venus úr Sandavági frá 1961, sum síðan bleiv útbygt til at umfata 70 stállínuskip úr øllum Føroyum frá 1956 til 1970.

Um somu tíð var ein facebook persónsprofilur stovnaður (Skipini í Vágum, seinni Siglingarsøgan í Vágum), sum bleiv brúktur til skipamyndir, hetta bleiv tó steðga av facebook í august 2015 og tá kom omanfyri nevndi bólkur ístaðin.

Heimasíða stovnað í 2011.

Facebook virkar tíðum til at vera nokkso rótut, tí bleiv avgerð tikin at stovnað heimasíðuna www.vagaskip.dk so ein og hvør, í frið og náðum kundi seta seg at granska vágaskip og søgur teirra, og sum eftirhondini er blivi eitt rúgvusmikið savn, har ymsar hendingar við skipum vera lýstar, summar ikki so væl gjøgnumførdar, aðrar á høgum støði, tá eg nú sjálvur skal siga tað. Eitt nú fylgdi eg við gamla Vesturvón frá 1969 í eini 4-5 ár, heilt fram til hann sakk, tann greinin kann lesast HER.

Sandavágur - gamlar myndir

Sum ein ”hjáveiða” til hesi trý omanfyri nevndu myndasøvn um skip, kom ein facebook bólkur við gomlum myndum úr Sandavági undan kavi, sum fekk sera góða móttøku ímillum bygdafólkið og hjá øðrum við tilknýti til bygdina. Har liggja áleið 4750 myndir í løtuni.

Yvirlit yvir myndasøvn.

Á facebook:

Siglingarsøgan í Vágum (bólkur) myndasavn við 2350 myndum higartil og 1140 fylgjarum. Trýst HER.

Venus VA51 og hini stállínuskipini. 1560 myndir og 1155 fylgjarar. Trýst HER.

Siglingarsøgan í Vágum (síða) brúkt til at lýsa ymiskt frá vagaskip.dk og og øðrum tíðindamiðlum, tá nakað hendir við teimun fáu skipunum sum eru eftir í Vágum í dag. Síðan hevur 3770 fylgjarar. Trýst HER.

Sandavágur – gamlar myndir 4750 myndir og 1756 fylgjarar. Trýst HER.

Heimasíðan:

Og til seinast henda heimasíðan www.vagaskip.dk við áleið 3000 myndum og upplýsingum og fleiri videobrotum niðast úti í vinstru síðu.

Vinarliga Jan Erik Simonsen

Fyrrverandi Atlantsfarið sokkið við kai.

18. februar 2017

Fyrrverandi Atlantsfarið sokkið við kai.

Atlantsfarið úr Miðvági, sum í dag eitur Regina Caelis liggur sokkin við kai í Portaferry í Norður-Írlandi.

Tað var tann 27. januar at Regina Caelis sakk í Portaferry, í deilstatinum County Down, sum liggur í landsynningspartinum av Norður-Írlandi.

Les meira um hendingina og søguna hjá skonnartini HER

janerik

www.vagaskip.dk

Høgifossur missur róðrið á heimleið úr Grønlandi í 1977.

18. september 2016

Høgifossur missur róðrið á heimleið úr Grønlandi í 1977.

Høgifossur var farin at sigla heim tollaksmessudag við fullari last av góðum Grønlands rækjum. Umborð vóru 15 mans og skipari var Svabo Joensen úr Sandavági. Hann hevði ikki verið skipari allan túrin, men var komin umborð 1. december. Alt vísti seg at rigga umborð, og jólaaftan var hildin sum vanligt.

Les meira HER

Málningur av kolfýrda síðutrolaranum Varðberg úr Miðvági.

09. september 2016

Málningur av kolfýrda síðutrolaranum Varðberg úr Miðvági.

Mynd av málningi sum Aberdeen málarin George Wiseman (1906-1986) hevur mála.

Les meira um George Wiseman HER

Les og sí fleiri myndir av Varðberg og eisini um hendingina við danska farmaskipinum. Trýst HER.

janerik

www.vagaskip

Tað gongur skjótt at fylla Vesturleika

27.august 2016

Tað gongur skjótt at fylla Vesturleika

Í dag fór Vesturleiki at sigla móti Qasigiannguit við 240 tonsum í lastini.

Tað tók ikki meir enn 14 dagar hjá jollunum at fylla Vesturleika.

Vesturleiki landaði  í Qasigiannguit  tann13.august, 250 tons. Og túrin áðrenn tað landaðu teir 245 tons, eisini í Qasigiannguit, tað var 28. Juli.

Qasigiannguit kenna eldri føroyingar best sum Christians Håb.

Teir vóru inni í Ilulissat (Jakobshavn) 16. august og bunkraðu.

Herning Simonsen, skipari sigur at dagarnir eru ójavnir, 8 til 12 tons vera

“innhandla” onkran dag, aðrar dagar upp í 30 til 40 tons, tað mesta er

svartkalvi. Teir seinastu 10 dagarnar hava vit tikið ímóti 220 tonsun, tað

gevur 20 tons um døgnið í miðal.

www.vagaskip.dk

janerik

Vesturleiki rópti yvir VHF'in at nú var lastin skjótt full, 1/2 tíma eftir lógu 12 jollur og bíðaðu eftir tørni at landa :). Skiparin leggur afturat at nú vita teir hvat teir skullu gera tá ein slakk perioda er :) - mynd: Herning Simonsen

Vesturleiki er móttøkuskip hjá útróðrarmonnum í Grønlandi - mynd: Herning Simonsen

Fyrrverandi Lækkaklettur úr Miðvági rendi á land.

24. august 2016

Fyrrverandi Lækkaklettur úr Miðvági rendi á land.

Seint týskvøldið rendi fyrrverandi Lækkaklettur úr Miðvági, sum í dag eitur Runavik GG44 og hevur heimstað í Fiskebäck í Svøríki á land uttanfyri fiskaríhavnina í Björkö.

Orsøkin til hví hetta hendi er enn ógreið, men skipið dreygaði knappliga í stýriborð, beint áðrenn innsiglingina til fiskaríhavnina í Björkö sum liggur uttanfyri Torslanda. Tað var eingin mannskaði tá Runavik silgdi á land og tað var ongantíð nakar vandi á ferð undir hendingini.

Runavik er kendur sum ein av teimun 9 polakkunum sum blivu bygdir til Føroyar í 1976 og ’77.

Runavik er upprunaliga bygdur sum Lækkaklettur VA6, við heimstaði í Miðvági, og eigari var eitt felag hjá Godtfred Joensen, skipið bleiv latið eigaranum í 1976 frá skipasmiðjuni  Szczecinska Stocznia í  Stettin í  Póllandi.

Í 1979 bleiv Lækkaklettur seldur inn á Strendir og fekk navnið Høgiklettur FD628. Og longu í 1982 kom skipið ”heimaftur” tá tað bleiv keypt til Sandavágs og fekk navnið Vágaklettur VA286.

Í 1985 keyptu vestmenningar Vágaklett, og góvu honum navnið Neptun, Neptun partrolaði við ein annan ”polakk” nevniliga Vesturleika, sum sama felag í Vestmanna keypti úr Sørvági.

Svenskarar keyptu skipið í 1991 og lógu longi á Runavík og riggaðu til, tað er helst frá hesi tíðini teir hava fingið sær navnið Runavik til skipið.

Tað var í 1974 at P/F Marknaðarrøkt var sett á stovn , og lat teir 9 Polen-línubátarnar byggja.

Hetta var ein røð av systurskipum uppá 9, millum mannað, vanliga kallaðir ”polakkarnir”.

Skipini blivu bygd í Stettin í Póllandi, sum línu- og garnaskip, nøkur blivu umbygd til trolara seinni.

Tað serstaka við hesari skipatypu var at 4 av 9 skipum vóru heimahoyrandi í Vágum, sum nýbygningar.

Teir komu í hesari røð:

1. Vaðhorn til Eiðis

2. Bláfossur til Tvøroyrar

3. Hamraberg til Miðvágs

4. Lækkaklettur til Miðvágs

5. Mascot til Toftir

6. Núpur til Klaksvíkar

7. Heldarstindur til Sandavágs

8. Vesturleiki til Sørvágs

9. Hagaleiti til Leirvíkar

Í dag eru bara Mascot og Sigmund fyrrverandi Vaðhorn eftir í føroyska fiskiflotanum.

Myndir: Hasse Karlsson, Johan Göthesson, Eddi Leyni, Páll Hellu

www.vagaskip.dk

janerik

Lækkaklettur VA6 - Miðvágur - Mynd: Eddi Leyni

Vágaklettur VA286 - Sandavágur - mynd: Páll Hellu

Venus VA51 & hini stállínuskipini frá 1956 til 1970.

20. juli 2016

 Venus VA51 & hini stállínuskipini frá 1956 til 1970.

Á facebook er ein heimasíða við myndum av stállínuskipunum, sum komu sum nýbygningar til Føroyar og blivu bygd í Føroyum. Tað fyrsta kom í 1956 og myndasavnið gongur fram til 1970.

Tað er ikki neyðugt at hava facebook-vanga fyri at síggja myndirnar, tí hetta er ein sokallað webpage.

Síðan eitur Venus VA51 og sum navnið sigur byrjaði alt við einum stórum myndasavnið av myndum frá Venus sum eru fingnar til vega ymsastaðni frá. Takk skulu tit hava, sum hava hjálp til við myndum.

Les meir um stállínuskipini her á síðuni, tú finnur STÁLLÍNUSKIPINI niðarlaga í vinstru síðu ella trýst HER.

Niðast á STÁLLÍNUSKIPINI  eru leinkjur til íalt 80 myndamappur og 5 video á facebook síðuni Venus VA51.

Beinleiðis til facebook-síðuna Venus VA51 ella myndamappurnar trýst HER.

janerik

www.vagaskip.dk

Rokfiskiskapur í Grønlandi‏

17. juli 2016

Rokfiskiskapur í Grønlandi‏

Sørvágstrolarin Vesturleiki tekur ímóti svartkalva frá jollufiskarum í Grønlandi.

Í gjár fóru teir at sigla til Qasigiannguit við fullari last at landa.

Jollurnar fyltu Vesturleika uppá 8 døgn. 

Hetta er annar túrurin síðan teir byrjaðu fyrst í juli mánað, so teir hava tikið ímóti 400 tonsum av svartkalva í 16 dagar.

Hetta eru ótrúliga góðir fiskimenn, leggur skiparin á Vesturleika, Heðin Hansen úr Sørvági afturat.

janerik

www.vagaskip.dk

Sørvágstrolarin Vesturvón frá 1969.

11. december 2019

Sørvágstrolarin Vesturvón frá 1969.

Vesturvón – stoltleikin hjá sørvingum – krússaði seg ígjøgnum fíggjarlig stormlágtrýst, vinnuligar ósemjur og maskinskaðar. Miðlaumtala var so at siga dagligdagur hjá skipið, manning og reiðaravirki upp ígjøgnum 1970ini. Allíkavæl hóraðu teir undan og fingu vind í seglini.

Hvussu alt hetta læt seg gera, kann lesast um í bókini.

Trýst HER ella finn VESTURVÓN 1969 úti í vinstru síðu.

janerik

www.vagaskip.dk

Línuskipið Eivind nýggjan høvuðsmotor.

09. juli 2016

Línuskipið Eivind nýggjan høvuðsmotor.

Eivind hevði trupuleikar við gearinum og bleiv sleipaður úr Kollafirði til Havnar tann 20. juni.

Tá gearið var gjøgnumgingið hjá skipasmiðjuni Mest, komu aðrir trupuleikar undan kavið við høvuðsmotorinum.

Serfrøðingar hjá motorverksmiðjuni komu til Føroyar og niðurstøðan bleiv at høvuðsmotorurin mátti skiftast.

Høvuðsmotorurin er belgiskur av slagnum ABC (Anglo Belgian Corporation) 6DZC og er 749 kW.

Reiðarin Hálvdan Gudmundsen sigur at leveringstíðin fyri ein nýggjan motor er lang, og eini 5 aðrir motorar stóðu á bíðleggingarlistanum hjá ABC at fáa motor. Tískil kemur ein nýggjur motorur í smærri lutum til Føroyar í bingju og verður settur saman á skipasmiðjuni Mest í Havn. Tað verða menn frá ABC sum koma at standa fyri arbeiðinum at samla motorin í hølum hjá Mest, við hjálp frá smiðjumonnum hjá Mest.

Uppá henda máta vinna vit 1,5 mánað í liggitíð, sigur Hálvdan at enda, sum annars er glaður um at feilurin bleiv funnin nú og ikki á fiskileiðum við til dømis Flemmis Cap.

Eivind bleiv tikin uppá beding fríggjadagin, og verður hol skorið í síðuna í maskinrúminum og gamli motorurin tikin úr, Mest stendur fyri hesum arbeiðinum.

Eivind er bygdur á Solstrand Verft í Tomrefjord í Noreg í 1988, og var keyptur til Sandavágs í 2014.

janerik

www.vagaskip.dk

Høvuðsmotorurin er belgiskur av slagnum ABC (Anglo Belgian Corporation) 6DZC og er 749 kW. - mynd: Jan Erik Simonsen

Lagt til rættis Jan Erik Simonsen

www.vagaskip.dk