Jesar sum ungur

Sum flest ung í bygdini tá í tíðini, arbeiddi Jesar í fiski og róði út við pápanum Hans Edmundi, sum var íðin útróðrarmaður. Jørð var í húsinum, og Jesar var við í hesum arbeiði.

Fyrstu myndirnar

Tær fyrstu myndirnar hjá Jesari í Heygnum, sum hann eisini varð nevndur, eru frá 1932, tá hann var staddur í Klaksvík til fótbóltsdyst. Ferðin til Klaksvíkar varð gjørd við sluppini Thor, ið tá hevði heimstað í Sørvági. Sandavágsmaðurin Sørin Nielsen, skipari, búsitandi í Sørvági, keypti sluppina frá Firma J.E. Thomsen’s Efterfølgere, í 1928.

Um summarið í 1932 fór Jesar við hesi somu sluppini á Vesturlandið í Íslandi, og myndatólið var eisini við á hesum túrinum. Jesar er um hetta mundi 20 ára gamal.

Jesar framkallaði myndirnar sjálvur, tí útgerðina til tað hevði hann útvegað sær til at hava heima við hús. Tær fyrstu myndirnar vóru misjavnar, og helst er tað tí, at hann ongar royndir hevði við framkalling í fyrstuni. Eitt rím, sum onkur fann uppá í Sandavági um Jesar var: “Menschenkinder, hann gerð myndir”.

Óvist er, hvat Jesar tókst við í 1933, men í 1934 og 1935 er Jesar við skonnartini, Sólarris, úr Sandavági. Í 1934 eru teir til fiskiskap á Suðurlandinum og í Vesturgrønlandi, og í 1935 eru teir í Vesturgrønlandi. Ein røð av forkunnugum myndum frá hesum túrum til skips hjá Jesari eru at finna á heimasíðuni www.vagaskip.fo. Eisini skrivaði hann um eina hending, tá teir viltust í mjørka í september í 1935 í Grønlandi. “Ein nátt á Sótnesi” er greinarøð við hesi hending, sum hevur verið í Sosialinum fyri stuttum.

Í Heygnum í Sandavági

Jesar var føddur í Sandavági hin 22. august í 1912, hann var nummar fýra av fimm systkjum. Eldru systkini vóru Nicodemus og tvíburðarnir Akku og Elsba Nikolina. Síðani kom Jesar, ið var doyptur Jeser Jens Jacob Hansen. Yngsti bróðurin var Carl Edvard. Foreldrini vórðu Elsba Frederikka og Hans Edmund Hansen. Tey búsettust í Heygnum, uttarlaga á Sondum.

Húsini í Heygnum vórðu upprunaliga bygd í 1869. Nýggj hús, ið eisini vóru longd suður eftir, vórðu bygd á grundina um 1902.

Bókhaldari og krambakallur

Virksemi hjá Hjalmari Nielsen, keypmanni, var handil við gerandisvørum, fiskaturking í pakkhúsinum úti á Bakka (Hjalmar’sa pakkhús) og motorsluppin Sjóløvan. Hann var eisini útgerðarmaður á sluppini Research, ið Kristian á Steig átti. Hjalmar var nógv upptikin av fundararbeiði, tí hann var í føroysku samráðingarnevndini innan handil og vinnulív, ið samráddist við grannalondini um ymisk viðurskifti. Løgmaður stóð  á odda fyri sendinevndini.

Í hesum handilsvirki fekk Jesar arbeiði. Hann tók sær av bókhaldi, skrivstovuarbeiði, og hann stóð eisini í handlinum.

Flott dekorerað viðmæli til Herthu Petersen, gift Simonsen. Ogn: Herdis Hentze / Sandavágs Fornminnafelag.

Jesar gjørdi flotta, dekoreraða plakat við skránni fyri kirkjukonsertina í Sandavágs kirkju. Og soleiðis var hvørja ferð okkurt tiltak var, so gjørdi hann dekorativar plakatir.

Yrkti, teknaði, dekoreraði og skrivaði sjónleik

Jesar yrkti mangan sangin til konfirmatiónir, brúðleyp, gullbrúðleyp og rundar føðingardagar. Tá Nýggjaberg fórst í 1942, yrkti hann ein sang um hendingina. Hetta lá honum nær, tí hann arbeiddi hjá pápa 19 ára gamla Niels Jakku, sum var við feigdartúrin.

Eisini lá væl fyri at tekna og dekorera, tá lýsast skuldi við onkrum hjá sangkórinum, men eisini til onnur høvi nýtti hann síni evni.

Hann var við til at fyriskipa vágastevnur í 1940- og 1950-árunum.

Jesar skrivaði sjónleik, ið var framførdur í bygdini og aðrastaðni við. Heitið var “Týsk landgongd í Rottugjónni”.

Myndir tiknar í 1941. Jesar staddur í túninum í Heygnum við skelti til varðan á Húsafelli.

Á Húsafelli á varðanum. Sitandi Lindal Jacobsen. Standandi f.v. Leivur Joensen, Símun Danielsen og Louis Johannesen. Jesar tekur myndina. Úr myndasavninum hjá Jesari Hansen / Sandavágs Fornminnafelag.

Í juni 1957 er ein av yvirskriftunum á forsíðuni í Dagblaðnum, “Gestabók 592 metur yvir havinum”. Har verður umrøtt, at gestabók er løgd á uppi á Húsafelli. Hetta er kanska hin fyrsta í Føroyum á einum fjallatindi. Sagt verður, at fleiri enn 100 hava skrivað seg í bókina higartil.

Samanborið við gestabókina á Malinstindi, so høvdu 100 gestir skriva seg í bókina har eftir tveimum árum. So helst er bókin á Húsafelli komin summarið í 1955.

Í 1958 var gestabók eisini løgd uppi á Malinstindi. Og har skrivar Jesar á fyrstu síðu:

Í hesa bók biðjast fjallagestir gera so væl at skriva ymiskar viðmerkingar og hugskot viðvíkjandi útsýni – náttúru ella eisini t.d. ferðalagnum – veðurlagið á toppinum hendan dagin, og um gestirnir eru á útferð – fjalli – skjóta harur o.a.

Fjallagestir! gerið so væl at ganga væl um bøkurnar – sum seinni fram í tíðini – koma at hava søguligt virði – og leggið bøkurnar aftur í kassan, áðrenn gingið verður frá.

Sandavágur 10/6-1958 Jesar Hansen

Jesar Hansen á ferð í Danmark í 1949, 37 ára gamal. Úr myndasavninum hjá Jesari Hansen / Sandavágs Fornminnafelag.

Partafelagið Hjalmar Nielsen

Hjalmar Nielsen f. 9. februar 1898 // d. 28. januar 1949 (49 ár)

Eftir at hava verið sjúkur eina tíð, andaðist Hjalmar Nielsen, keypmaður, 49 ára gamal, hann var 12 dagar frá at gerðast 50 ár.

Hetta setti einkjuna Margrethu í eina støðu, at hon skuldi avgera um handils- og reiðaravirksemi skuldi seljast, ella um tað skuldi rekast víðari.

Tá er tað, at Jesar Hansen kemur inn í felagið sum partaeigari. Viðtøkurnar fyri nýggja partafelagið P/F Hjalmar Nielsen, verða dagfestar hin 22. juni í 1949. Partapeningurin í nýggja partafelagnum er krónur 75.000,-.

Motorsluppin Sjóløvan við kai í Sandavági, hon hoyrdi til handilsvirkið hjá Hjalmari Nielsen og  eisini til P/F Hjalmar Nielsen. Úr myndasavninum hjá Jesari Hansen / Sandavágs Fornminnafelag.

Nú var 37 ára gamli Jesar ikki bara handilsfulltrúi, men eisini vinnulívsmaður, umframt øll frítíðarítrivini hann hevði: myndamaður, fyriskipari av ymsum, sangari, skrivari og dekoratørur í Sandavágs sangkóri, yrkjari, sjónleikararithøvundur og grein- og søguskrivari. Men enn var hann stakur.

Jesar, 45 ár, innlagdur á turberkladeildini á Dronning Alexandrines hospitali í 1957/58. Úr myndasavninum hjá Jesari Hansen / Sandavágs Fornminnafelag.

Húsagangur

Á várið í 1960 fer at sansa at í partafelagnum Hjalmar Nielsen.

Hin 16. mars í 1960 verður motorsluppin Sjóløvan hjá P/F Hjalmar Nielsen seld í fútarættinum.

Og hin 5. mai var tvingsilssøla av ognunum í Sandavági. Pakkhús í trimum hæddum við turkaríi, eitt frystihús og eitt handilshús. Umframt hetta, trý fiskastykkir hjá partafelagnum.

Í september í 1960 eru fastognirnar hjá trotabúðnum/partafelagnum enn ikki seldar, og sakførarin roynir at selja ognirnar í Sandavági.

Sethúsini hjá Jesari Hansen, stóðu leingi liðug, men tey vóru ikki avskildrað. Eingin flutti inn, fyrr enn Hans Pauli í Horni keypti húsini í mai í 1969. Úr myndasavninum hjá Jesari Hansen / Tjóðsavnið.

Innlagdur á landsjúkrahúsinum í Havn

Veturin 1957/58 var Jesar innlagdur á Landsjúkrahúsinum í Havn. Sjálvt um tað ikki er loyvt at taka myndir inni á sjúkraúsinum, er tað kortini eydnast Jesari at taka 120 gerandismyndir á tuberkladeildini á Dronning Alexandrines hospitali.

Hetta eru forkunnugar myndir, sum í dag hava stórt søguligt virði, og myndaframsýning var á Landssjúkrahúsinum í 2018 við hesum myndum.

Jesar vitjaði tvær ferðir heima í Føroyumi tíðarskeiðnum, hann búði í Hammerferst. Í 1965, sum nevnt omanfyri, og í 1972.

Jesar Hansen andaðist 8. juni í 1977, 64 ára gamal. Hann er jarðaður í Hammerfest hin 14. juni í 1977.

Kona Jesar, Josefine Karllotta Arnesen, gift Hansen, andaðist hin 10. mai í 2006, 88 ára gomul. Hon liggur grivin undir liðini á Jesari við egnum gravsteini.

Jesar og Josefine fingu eingi børn.